Görüşlər zamanı qaldırılan məsələləri yerli "liderlərə" məruzə edəndə biganəliklə qarşılaşırdım
Deputatlığa namizəd Nərgiz Əliyeva: "Görüşlər zamanı qaldırılan vacib məsələləri yerli "liderlərə" məruzə edəndə biganəliklə qarşılaşırdım"
Vahid Milli Hərəkat partiyasının Marneuli şəhərindən
majoritar deputatlığa namizəd olan ictimaiyyət içində fəal qadın olan Nərgiz
Əliyeva şəxsi facebook hesabında önəmli açıqlamalar verib. Biz
yazını olduğu kimi təqdim edirik:
“Çoxsaylı suallarınızı nəzərə alaraq son dəfə bu
mövzuda bir sıra məsələlərə aydınlıq gətirmək istəyirəm, əzizlərim! Ən çox səslənən
suallardan biri nədən "Gürcü arzusu" partiyasına dəstəyimi dayandırıb
Vahid Milli Hərəkat partiyasının sıralarına qoşuldum. ilk öncə, bunu vurğulamaq
istəyirəm ki, insan bir partiyaya siyasi mövgeyilə üst- üstə
düşən ideologiyasına və bu ideologiyaya
sadiq qalıb gördüyü işlərə görə qoşulur, təssüflər olsun ki, “Gürcü arzusu”
partiyasının dedikləri ilə etdikləri arasında böyük fərq var, bunu anlamağım
üçün bir müddət zaman lazım imiş, lakin bu gün seçdiyim yola inanıram; ən azı
ona görə ki, Vahid Milli Hərəkat partiyasının dövründəki inkişafı görmüşəm. Bu
gün yerli məmurların 60%-dən çoxu zamanında bu partiyanın yetirmələri,
Saakaşvili məktəbini keçənlər olub, hakimiyyət dəyişən kimi iqtidara keçərək
mövqelərini dəyişiblər. Mən və bir çoxları bu gün hakim partiyadan müxalifətə
keçmişik, bu önəmli məqama diqqət yetirsəniz lazımlı qənaətə gələ bilərsiniz.
Partiya dəyişmək olar, bu normaldır, anormal isə odur ki, qüsur və
haqsızlıqları görüb orada fəaliyyətini davam etməkdir. Heç kim üçün sirr deyil
ki, mən bir müddət "Gürcü arzusu" partiyasının dəvəti və təklifi ilə
təbliğatda və seçkiöncəsi kampaniyalarında fəal iştirak etmişəm, lakin, bu günədək
heç bir partiyanın üzvü olmamışam. Çalışdığım yeganə dövlət işi ictimai
kitabxana olub. Bir çoxları kimi, adıçəkilən partiya hakimiyyətə gəldiyi dövrlərdə
ölkəmizin inkişafı, insanların sosial-iqtisadi rifahının yaxşılaşdırılması, iş
yerlərinin açılması, vergilərin azalması və sair kimi vədlər verirdi. Partiya
platforması demək olarki mükəmməl idi. Bu cür həyatı kim istəməzdiki? Kim dəstəkləməzdiki?
Mən də bir çoxları kimi bu yağlı vədlərə inanıb, cüzi sayda görülən işlərin
görüntüsünə aldanıb, onlara dəstək verdim. Bəli, müəyyən işlər görülürdü, lakin
kifayət deyildi. Xalq öz tələbini edəndə hakimiyyət deyirdi ki, hər şey birdən-birə
qurulmur, bizə zaman lazımdır. Gözləyirdik. Mən, iki il seçkiöncəsi qadınlarla
görüşlər keçirdim. Masa arxasında platformaları təqdim etməkdən daha çox
problemlərlə maraqlanırdım, protokollaşdırıb namizədlərə təqdim edirdim. Görüşlər
zamanı qaldırılan məsələləri yerli "liderlərə" məruzə edəndə biganəliklə
qarşılaşırdım. Mövcud olan problemlərin həlli nə yerdədir sualıma xalq birmənalı
şəkildə heç nə həll edilməyib deyirdi. Tələb edəndə, düzələr deyə cavablar
alırdıq. Gözlədik. İkinci seçki ili zamanı bu görüşlərə gedərkən eyni problemlərin
qaldırıldığını və həll edilmədiyini gördükdə bir daha onların nümayəndəsi
olaraq xalqla görüşüb boş vədlər verməyəcəyimə qərar verdim. Çünki xalq namizədlərdən
və ya seçilən o nümayəndələrdən cavab ala bilməyincə haqlı olaraq bizlərdən tələbini
edərdi. Beləliklə, biz onların boş yalan vədlərini əhali nümayəndələrinə çatdıran
kimi aciz və çıxılmaz vəziyyətdə qalırdıq. Bu hallar bu gün də davam edir və
siz bu partiyanın bir çox fəalı və təbliğatçısını dinləyirsiniz. Bu səbəbə görə
biz "xalq içinə çıxa bilmirik, çünki hamı bizdən konkret cavab istəyir,
pis durumdayıq",- deyirlər. Səbəbin biri budur ki, mən yalan vədlər vermək
istəmədim, özümün inanmadığıma xalqı inandıra bilməzdim. İkinci məsələ, şəxsimə
və mənimlə birlikdə onlarla gəncə edilən haqsızlıqlar, ikiüzlülüklər, ləkələndirmək
üçün çirkin planlar, xalq arasında yayılan çirkin iftiralar, gözdən salmaq üçün
min bir uydurmalar, "yuxarıda" bloklamalar və s. Bunlar "liderlər"in
bacardığı ən gözəl işlərdir. Bu günədək yerli özünüidarəetmədə neçə nəfər gənc
səbəbsiz işdən azad edilib və həmin gənclərin karyerasına xətt çəkilibdir!
Kiminin göz rəngini bəyənməyiblər, kiminin bacarığından qorxublar. Səbəb? Səbəbin
cavabı çox sadədir; onlardan irəli kimsə getməməlidir! Məni işdən azad etməsələr
də, səsimi boğmaq üçün məlum işlə təmin edib "zərərsizləşdiriblər".
(Həmin işdə gözəl kollektivlə çalışdığım üçün məmnunam,sözüm onda deyil). Biz
"zərərsizləşdirilmiş" gənclər nə zaman yada düşürdük? Təbiiki seçki ərəfəsində.
İşdən qovulanların bir çoxuna bugün də “gəl bizə köməklik et səni işə qəbul edəcəyik”,-deyə
vəd verib yenidən aldadanlar var. Buna dözə bilmədim. Tam məsuliyyətlə deyə bilərəm
ki, mən Nərgiz Əliyevanın işdən şəxsi istəyimlə çıxandan öncə heç bir vəzifə,
iş tələb etməmişəm ki, rədd cavabı alam. Bu, məntiqsizdir, çünki seçkiöncəsi
kimsəyə qəti yox demirlər;) Bu səbəblər siyahısını və mən də daxil olmaqla
onlarla insana edilən haqsızlıqları uzun- uzun sadalaya bilərəm. Lakin, qeyd
etdiklərimin əksəriyyəti daxili problemlərdir. Ölkə masştablı problemlər və mənim
fəal müxalifətə qoşulmaqdakı məqsədim haqqında yaxın günlərdə ətraflı açıqlamalarım
olacaq. Güman edirəm ki, bu mövzuda artıq suallar olmayacaq”.
GAXA.ge