Gürcüstanda aprelin 23-dən “Kitab hədiyyə ver” kampaniyası başlayıb
Gürcüstanda aprelin 23-dən “Kitab hədiyyə ver”
kampaniyası başlayıb. GAXA-nın məlumatına görə, tədbir bu il Tiflisin Dünya
Kitab Paytaxtı statusu alması ilə əlamətdar olacaq.
1995-ci ildə UNESCO tərəfindən təsis edilən Dünya
Kitab və Müəllif Hüquqları Günü hər il 23 aprel tarixində qeyd olunur. İlk dəfə
23 aprel 1996-cı ildə qeyd olunub.
Əhalini bu gün münasibətilə təbrik edən Gürcüstanın
Təhsil və Elm naziri Mixail Çxenkeli hər kəsi bu kampaniyada fəal iştirak etməyə
və kitabı təbliğ etməyə çağırıb.
Qeyd edək ki, Tiflis bir il ərzində dünya kitab
paytaxtı olacaq.
"Kitab və Müəllif Hüquqları Gününün 20 ilə
yaxındır Gürcüstanda qeyd olunmasına sevinirəm. Bu günün dünya ədəbi dahiləri
ilə əlaqəli olması simvolikdir. Gürcüstanda bu gün kitab bağışlamaq, kitabları
populyarlaşdırmaq üçün bir gün kimi təsis edildi. Nəticə etibarilə bir kitab
bir-birimizə xatirə olaraq verə biləcəyimiz ən yaxşı hədiyyələrdən biridir",-
deyə Mixail Çxenkeli bildirib.
23 Aprel Dünya Kitab və Müəllif Hüquqları Günündə
Tiflis bir il müddətinə Dünya Kitab Paytaxtı statusunu aldı. Kitab paytaxtının
statusu, Malayziyanın paytaxtı Kuala Lumpur meriyası nümayəndə heyəti tərəfindən
Tiflis şəhərinin başçısı Kaxa Kaladzeyə veriləcək.
UNESCO-nun Dünya Kitab Paytaxtı 2002-ci ildə
UNESCO-nun Baş Konfransının qərarı ilə yaradılan geniş miqyaslı bir layihədir.
Kitab və mütaliəni təşviq etmək, kitab sənayesini və bütün əlaqəli sahələri
tanıtmaq və müasir müəllifləri, tərcüməçiləri, kitabxanaları və naşirləri dəstəkləmək
məqsədi daşıyır.
GAXA.ge