Əflatun Amaşov yazır…
Rusiya tərəfindən Azərbaycanın kütləvi informasiya
vasitələri bloklanır. Yəni onların Rusiya ərazisindəki yayımına məhdudiyyət
qoyulur. Söhbət konkret olaraq rus dilli "haqqin.az" və
"minval.az" saytına münasibətdən gedir. Əlbəttə, siyahı genişlənə də
bilər.
Hansısa dövlətin özünün informasiya məkanını ümumi
kursa zidd təmayüllərdən qoruması
anlaşılandır. Ancaq Azərbaycanın kütləvi informasiya vasitələri nə edir
ki, belə rəftara layiq görülür? Obyektiv yanaşma, həqiqətləri yazmağa dözmək
belə çətindir? Axı Rusiya müstəqil Ukraynanın ərazisinə qoşun yeridib. Bunun
arxasında hansı qlobal siyasi məqamlar var, bu, başqa məsələ. Fakt budur ki,
ortada işğal var və bizim media orqanlarımızın məhz bu danılmaz reallığa söykənməsi
məqbuldur.
Digər tərəfdən, yaxın keçmişə nəzər salaq. 44 günlük
müharibə dönəmində Rusiyanın əksər KİV-ləri nə edirdilər, hansı mövqeni
tuturdular, yaxşı yadımızdadır. Onlar elə təəssürat yaradırdılar ki, sanki illərdir
işğala məruz qalan Azərbaycan yox, Ermənistandır. Təsadüfi deyil ki, Azərbaycan
prezidenti də Rusiyanın RBK telekanalına müsahibəsində bu məqama diqqət
yetirmiş və bildirmişdi ki, belə hallar Rusiyanın Azərbaycandakı nüfuzuna mənfi
təsir göstərir. Həmin dönəmdə Azərbaycan Mətbuat Şurası da Rusiya KİV-lərinin,
o cümlədən peqovların, solovyovların və digər onlar kimilərinin "fəaliyyəti"nə
dair Rusiya Jurnalistlər İttifaqına və ölkənin digər media qurumlarına müraciətlər
ünvanladı. Amma xeyri olmadı.
Bəli, Azərbaycan KİV-ləri haqlı olaraq Rusiya-Ukrayna
müharibəsinə geniş yer verir. Bu mənada "haqqin.az" saytının fəaliyyətini
xüsusi vurğulamalıyam. Eynulla Fətullayev müharibənin ilk günlərindən
Ukraynadaydı. Ən gərgin nöqtələrdən yayımlar edirdi. Bu zaman həm peşə marağı,
həm də əsl həqiqətləri önə çəkmək əzmi öndəydi. Məhz bu keyfiyyətlərinə görə
"haqqın.az" həmişə Rusiya
oxucularının diqqət mərkəzində olub.
İndi Rusiyanın bloklama qərarı söz və ifadə azadlığına
sayğısızlıqdır. Əlahəzrət haqq və ədalət var. Azərbaycan KİV-ləri ona sadiqdir.
Bu sadiqlik eyni zamanda beynəlxalq hüququn prinsiplərinə, bəşəri prinsiplərə dəyərdir.
Əflatun Amaşov, Azərbaycan Mətbuat Şurasının sədri