Azərbaycan Respublikasının Prezidenti İlham Əliyev yanvarın 14-də Əhmədbəyli-Füzuli-Şuşa avtomobil yolunun 27-ci kilometrində Füzuli-Şuşa yolunun, həmçinin Füzuli rayonunda hava limanının təməlini qoyub. GAXA-nın məlumatına görə, həmin gün Prezident İlham Əliyev, Birinci vitse-prezident Mehriban Əliyeva və qızları Leyla Əliyeva Şuşada da olublar.
Bildirilib ki, Üzeyir Hacıbəyli, Xurşidbanu Natəvan və Bülbülün “güllələnmiş heykəllər”i Azərbaycan Prezidenti İlham Əliyevin səfəri zamanı Azərbaycanın işğaldan azad edilən mədəniyyət paytaxtı Şuşa şəhərinə aparılıb.
Heykəllər Şuşa şəhərində qoyulub. Dövlət başçısı heykəllərin açılışını edib.
Xatırladaq ki, Ermənistan Silahlı Qüvvələrinin 1992-ci ildə Şuşanı işğal edərkən Üzeyir Hacıbəyli, Xurşidbanu Natəvan və Bülbülün gülləbaran etdiyi heykəllər Bakıya gətirilmişdi və bu gün Şuşaya qaytarılıb.
GAXA.ge