Kutaisidəki parlament binasının tikintisinə 340 mln lari maliyyə xərcl...

Kutaisidəki parlament binasının tikintisinə 340 mln lari maliyyə xərclənib

06.12.2018
GAXA – Xəbər Agentliyi
Siyasət

Kutaisidəki parlament binasının tikintisinə 340 mln lari (təqribən keçən illərdəki kursa görə 205 mln dollar) maliyyə xərclənib. Gürcüstan Azərbaycanlılarının Xəbər Agentliyinin (www.gaxa.ge) məlumatına görə, tikinti başa çatdıqdan sonra uzun illər parlamentin Tiflisdəki tarixi binasında qanunvericilik işləri ilə məşğul olan parlamentarilər Kutaisidə fəaliyyətə başladılar.

Bütün bunlar 2012-ci ildə baş verib. 2011-ci ildə Vahid Milli Hərəkat partiyasının təqdimatı ilə parlamentin Kutaisi şəhərinə köçməyi haqqında Konstitusiyada düzəliş edildikdən sonra qanunverici orqan bir il sonra Kutaisiyə köçdü və yeni binada fəaliyyətə başladı.

“Gürcü Arzusu-Demokratik Gürcüstan” partiyası qələbə əldə etdikdən sonra iqtidar partiyası kimi qanunverici orqanın Kutaisidən Tiflisə köçməsi barədə məsələ qaldırdı, lakin səs çoxluğu əldə etmədikdə müvəqqəti olaraq məsələnin müzakirəsi sonraya saxlanıldı.

Bu gün keçirilən parlamentin iclasında qanunvericilik orqanın Tiflisə köçürülməyi barədə qaldırılan məsələnin təsdiq edilməsinə 150 deputatdan 77 deputat səs verib və 2 deputat qərarın əleyhinə çıxıb.
 
Qeyd edək ki, artıq parlament öz işinə Tiflisdəki köhnə binada başlayacaq və qanunverici orqan yazda yeni reqlamentdə fəaliyyət göstərəcək.