Azərbaycanın əməkdar artisti Yaqub Zurufçunun doğum günüdür. Yaşasaydı, 69 yaşını qeyd edəcəkdi. Allah rəhmət eləsin!

Cavid müəllimin Yaqub Zurufçu haqqında xatirəsini hörmətli oxuculara təqdim edirik.

Mart, 2016. Ordubad, Nüsnüs kəndi.

Anamın üç mərasimidir. Tanımadığım nömrədən zəng gəlir:

- Cavid bəy, salam. Mən Yaqub Zurufçu.

- Salam. Buyurun, Yaqub bəy!

- Mətbuatdan ananızın vəfat etdiyi xəbərini oxudum. Allah rəhmət eləsin!

- Allah ölənlərinizə rəhmət eləsin!

- Cavid bəy, biz şəxsən tanış deyilik. Amma yazılarınızı həmişə izləmişəm, ruhən doğma saymışam sizi özümə. Ona görə də bu ağır gününüzdə yanınızda ola bilməsəm də, telefonla başsağlığı verməyi özümə borc bildim.

- Təşəkkür edirəm diqqətiniz üçün, Yaqub bəy!

- Bilirəm, ana itkisini heç bir ifadə ilə ovutmaq mümkün deyil. Amma siz xoşbəxt adamsınız ki, ananız sizin çiyinlərinizdə getdi. Mənsə anamı 20 il görə bilmədim, dünyasını dəyişəndə çiynimi tabutunun altına verə bilmədim. Heç vaxt da anamın qəbrini ziyarət edə bilməmişəm.

Nə gizlədim, o ağır günlərdə aldığım ən böyük təsəlli bu oldu. Hər dəfə anam yadıma düşəndə bu sözləri xatırladım. İndi mənə o təsəllini verən adam yoxdur. Anasının, anamın olduğu dünyaya köç etdi. Yerin behişt olsun, Yaqub Zurufçu!

Cavid İsmayıl, tarix üzrə fəlsəfə doktoru

GAXA.ge

P.S: Cavid müəllim! Sizi narahat edən Nizam Məmmədzadədir. Yaqub Zurufçu haqqında xatirənizi icazənizlə GAXA.ge saytında vermək istəyirəm. Sizin razılığınızı da alanda sevindim. Çünki o mənə də yaxın adam idi. APA-da işləyəndə bir gün o mənə zəng elədi ki, Tiflisdə konsert vermək istəyirəm. Bir oteldə yer tut. Borçalıdan da azərbaycanlıları dəvət edək, onlar üçün konsert təşkil edək, deyə istəyini məndən xahiş etmişdi. Bir həftə ərzində mənə mahnılarını göndərdi ki, qulaq as. Mənuniyyətlə mahnılarını dinlədim. Borçalıya gələcəyini gözlədim. Fəqət, konsert ona qismət olmadı. 

Sizin yaxınlarınıza da, Yaqub Zurufçuya da Allah rəhmət eləsin! Ruhları şad olsun, Cavid müəllim!