Gürcüstan Milli Bankı heyəti Azərbaycan Respublikasının Mərkəzi Bankında olub
Gürcüstan Milli Bankı heyəti Azərbaycan Respublikasının Mərkəzi Bankında olub. Səfər çərçivəsində Milli Bankın prezidenti Natia Turnava ilə Azərbaycan Respublikası Mərkəzi Bankının prezidenti Taleh Kazımov arasında görüş keçirilib.
Tərəflər pul siyasəti və mərkəzi bankın fəaliyyəti sahəsində regional əməkdaşlığın gücləndirilməsi məsələlərini müzakirə ediblər.
Görüşdə ölkələr arasında maliyyə xidmətlərinin inkişafı imkanları, o cümlədən transsərhəd ödənişlərin səmərəliliyinin artırılması müzakirə olunub. Tərəflər tranzaksiya xərclərini azaltmaq və səmərəliliyi artırmaq məqsədilə bu sahədə əməkdaşlıq imkanlarını araşdırmaq barədə razılığa gəliblər.
Söhbət zamanı fintech sektorunda regional əməkdaşlığın əhəmiyyətinə də toxunulub. Bildirilib ki, iki ölkənin mərkəzi bankları arasında əməkdaşlığın dərinləşdirilməsi maliyyə xidmətlərinin inkişafının yeni mərhələsinə keçidə töhfə verəcək.
Gürcüstan Milli Bankı və Azərbaycan Respublikasının Mərkəzi Bankı arasında Qarşılıqlı Əməkdaşlıq Memorandumu imzalanıb.
Görüşdə Gürcüstanın Azərbaycan Respublikasındakı fövqəladə və səlahiyyətli səfiri Zurab Pataradze iştirak edib.
GAXA.ge
