Bu günlərdə əziz dostum, rəhmətlik Arif Aslan oğlu Əliyevin 65 illiyinə həsr olunmuş anım tədbiri keçirilib. Vaxtilə dostuma həsr etdiyim şeirləri oxucuların nəzərinə çatdırmağı özümə borc bildim. Allah rəhmət eləsin, ruhu şad olsun!

 Gözün aydın, gözəl elim Faxralı!

 (Faxralı kənd orta məktəbunə Arif Əliyevin adı verilərkən)

 

Gözün aydın, Borçalımın hər günü,

Tarixləşir, tarixləşir ad olur!

Nə gözəldir günümüzün mənası,

Bu mənada millətimiz şad olur.

 

Sinələrə arzu, ümid yığılır,

Sabahımız günəşlidir, ay ellər!

Sinələrdən qəm-kədər də dağılır,

Şirin-şirin nəğmə deyir bülbüllər!

 

Ömrümüzün gözəl çağı bax, budur!

Gedən gəlir, gələn bizə qonaqdır!

Borçalımız igidlərin yurdudur!

Tarix özü hər igidə ad qoyur!

 

Gözün aydın, gözəl elim, Faxralı!

Yaşıl yamac, gül-çiçəkli, qalalı...

Gözünü aç, nəzər yetir tarixə,

Daha Arif bu məktəbdə qalalı,

Gözün aydın, gözəl elim , Faxralı!

 22 iyul, 2013-cü il, Borçalı.

 

 Dünyadan vaxtsız köçən dostum

Arif Əliyevə

 

Sənin ölən vaxtın deyildi, qardaş,

Bu zülm, bu zillət haradan çıxdı?

Göyləri bürüdü qara buludlar,

... Şaqqıldayan şimşək haradan çaxdı?

 

Dağları bürüdü yağış, çiskin, qar,

O Gözəl dağında sənin evin var,

Qaldır başın dostlar gəlib nə olar,

Onların kədəri amandı, ahdı.

 

Yollara baxıram şümşəd kimidir,

Şütüyür maşınlar belədən-belə.

Sən isə yoxsan, ey mehriban dost,

Biz gələ bilmirik obaya, elə.

 

Dünya yalançıdır, dünya vəfasız,

Bu illər sinənə nə yazdı, qardaş.

Ömrün dolanbac yolunda deyim,

Yenə bilə-bilə biz azdıq, qardaş.

 

Könlümdə sərasər kədərlər yatır,

Gözümdə bu dünya qara geyinib.

Bir də görəcəksən Nizami köçüb,

O da bu dünyaya əlvida deyib.

 

Nizami Məmmədzadə,

Azərbaycanın Əməkdar jurnalisti,

AYB-nin üzvü

GAXA.ge