2018-ci ildə Xada dərəsində Smit ailəsinin 3 üzvünü öldürməkdə təqsirli bilinən Malxaz Kobauri cəzaçəkmə müəssisəsindən gürcü mətbuatına məktub göndərib. Üç il həbsxanada qaldıqdan sonra qeyri-müəyyən ömürlük həbsə məhkum edilən çoban Malxaz Kobauri qətli törətmədiyini iddia edir. Kobaurinin sözlərinə görə, o, artıq öldürülən Rayan Smitin anası ilə görüşmək istəmir, çünki cəsarət etmir, lakin Rayan Smitin qardaşı ilə danışmağa hazırdır.

Kobaurinin izah etdiyi kimi, onun cinayəti yalnız ona məlum olan məlumatları asayiş keşikçilərinə təqdim etməməsindən ibarətdir.

“Mən günahkar deyiləm və heç kim və heç nə məni ömrümün sonuna qədər bu mövqeyi dəyişməyə məcbur edə bilməz. Tək günahım odur ki, Rayan Smitin qətli ilə bağlı bildiklərimi polisə deməmişəm. Sadəcə qorxdum ki, hamı məni günahlandırsın. Sonda belə də oldu,” – deyə Kobauri deyib.

O, həmçinin Rayan Smitin anası Lin Smitdən aldığı məktub haqqında yazır və öldürülən şəxsin anası Kobaurini həbsxanada “çox dua etməyə” çağırır.

Məktubu alan məhkum Rayan Smitin anası ilə görüşmək arzusunda olduğunu bildirsə də, indi onunla görüşə bilməyəcəyini deyir.

“Bu ailəyə minnətdarlıq və hörmətdən başqa heç nə deyə bilmərəm. Ailə üzvlərini itirən insanlar haqqımda yalan, iyrənc məlumatlar versələr də, bütün bunlara baxmayaraq, əsəbiləşməyib, məni bağışlamağa güc tapıblar. Günahsız olsam da, başa düşürəm ki, onlara bunu sübut etmək mənim üçün çox çətindir. Bunun mənim üçün nə demək olduğunu sözlər təsvir edə bilməz”, - Kobauri deyir.

Məlumat üçün bildirək ki, 2018-ci ildə Xada dərəsində (Gürcüstanın Mtsxeta-Mtinati bölgəsi) qətl hadisəsi baş verib. Rayan və Laura Smitin, eləcə də onların 4 yaşlı oğlunun faciəvi qətli ilə bağlı 19 yaşlı çoban Malxaz Kobauri saxlanılıb. Qori Rayon Məhkəməsi ona ömürlük həbs cəzası verib. Həbsdə yatan Kobauri isə hələ günahını etiraf etmir.

Xatırladaq ki, Amerika vətəndaşı Rayan Smit ailəsi ilə birlikdə Marneulidə aldığı evdə yaşayıb və azərbaycanlı gənclərlə dost münasibətdə olub. O, vaxtilə Şəki şəhərində də yaşayıb və burada ingilis dilini tədris edib və bu şəhərdə Azərbaycan dilini mükəmməl öyrənərək sərbəst danışmağı bacarıb.

R. Smit Tiflisdə azərbaycanlı jurnalistlərə təşkil etdiyi tədbirlərdə müsahibə verməyə məmnuniyyətlə razılıq verirdi.  O, müsahiblərinin birində Marneuli şəhərində uşaqlar üçün idman meydançaları tikmək üçün yerli hökumətdən kömək istədiyini bildirmişdi. Ürəyi açıq, gülərüz və qayğıkeş insan olan Rayan Smit Azərbaycanı və Gürcüstanı çox sevirdi.

Rayan Smit və həyat yoldaşı Laura Smit Azərbaycanın, eləcə də Gürcüstanın azərbaycanlılar yaşayan bölgələrində müxtəlif çeşidli xalçaların Tiflisdə sərgisini təşkil edib və xalçalarımızın təbliği ilə məşğul olub. O, Tetri-Skaro (Ağbulaq) rayonundakı Kosalar kəndində yaşayan və cürbəcür xalçalar toxuyan təcrübəli azərbaycanlı qadın xalçaçıları yaxşı tanıyırdı və mütəmadi olaraq onlara Qarabağ, Borçalı, Qazax, Ləmbəli xalçaları toxumaq üçün sifariş verir və özünün dediyinə görə, həmin xalçaları Amerikaya satırdı.

GAXA.ge