Gürcüstan paytaxtında Azərbaycan səfirliyi 28 May – Müstəqillik Günü münasibətilə rəsmi qəbul təşkil edib
Rəsmi qəbul Azərbaycan səfiri Faiq Quliyev və hərbi attaşe
polkovnik-leytenant Fuad İbrahimovun iştirakı ilə həyata keçirilib. GAXA-nın məlumatına
görə, tədbirdə Gürcüstan və Azərbaycanın dövlət himnləri ifa edilib.
Tədbirin başlancığında çıxış edən Faiq Quliyev Azərbaycan Xalq
Cümhuriyyətinin (AXC) yaradılması tarixi haqqında rəsmi qəbulda iştirak edən
qonaqlara ətraflı məlumat verib.
Diplomat Azərbaycanın işğal altında olan torpaqlarının azad edilməsində
Gürcüstanda yaşayan azərbaycanlıların dəstəyini də xüsusi qeyd edib. Səfir
bildirib ki, 44 günlük müharibədə Gürcüstan əsilli 21 nəfər şəhidlik zirvəsinə
ucalıb. Biz onların xatirəsini ehtiramla anırıq, valideynlərinə bu cür qəhrəman
övladlar yetişdirdiyinə görə minnətdarıq.
Tədbirdə Gürcüstanın xarici işlər nazirinin birinci müavini Laşa
Darsalia əlamətdar tədbir münasibətilə Azərbaycan xalqını təbrik edib və əmin-amanlıq,
firavanlıq arzulayıb.
Rəsmi qəbul mərasiminə Azərbaycanın Milli Məclisinin Gürcüstanla
parlamentlərarası əlaqələr üzrə işçi qrupunun rəhbəri Arzu Nağıyev, “SOCAR
Energy Georgia” şirkətinin Baş direktoru Mahir Məmmədov, paytaxt Tiflisdəki diplomatik
korpus nümayəndələri, Gürcüstan Daxili işlər naziri, Barışıq və vətəndaş bərabərliyi
məsələləri üzrə nazir, Azərbaycanlı İş Adamları Birliyinin (AZEBİ) üzvləri, gürcü
və azərbaycanlı ziyalılar, müxtəlif partiyaların nümayəndələri, görkəmli mədəniyyət
və incəsənət xadimləri, din nümayəndələri, xarici səfirliklərin attaşeləri,
jurnalistlər, ətraf rayonlardan gələn azərbaycanlılar, QHT nümayəndələri
qatılıblar.
Tədbir konsert proqramı ilə
davam etdirilib.
Sonra 28 May – Müstəqillik Günü münasibətilə ziyafət təşkil edilib.
Qonaqlar Azərbaycan xalqının müxtəlif ləzzətli təamlarından dadaraq maraqlı
musiqi proqramlarında çıxış edən Azərbaycan və gürcü mahnılarını ifa edən müğənnilərin
ifasında mahnıları dinləyiblər.
GAXA.ge