Gürcüstandan 20 nəfər idmançı Bakı Marafonunda iştirak edəcək

Məlum olduğu kimi, Azərbaycan Respublikasının Gürcüstandakı Səfirliyinin təşəbbüsü ilə 2021-ci ildə Gürcüstanda 18 Oktyabr - Azərbaycanın Müstəqilliyinin Bərpası Gününün 30-cu ildönümünə həsr olunan Marafon keçirilib. GAXA-nın məlumatına görə, marafon Azərbaycan xalqının ümummilli lideri Heydər Əliyevin adını daşıyan Tiflis şəhərindəki parkdan Rustavi şəhərindəki parkadək davam edib.
Marafonda 30 km məsafəni uğurla qət edərək ilk üç yeri tutan şəxslər Azərbaycan səfirliyi tərəfindən diplom və müxtəlif hədiyyələrlə, həmçinin “finiş” nöqtəsinə çatan digər müsabiqə iştirakçıları da sertifikatlarla təltif olunub. Marafonda 8 ölkədən 300-ə yaxın idmançı və həvəskar iştirak edib.
Qeyd olunan Marafonda iştirak edən idmançılardan 20 nəfəri səfirliyə müraciət edərək, ənənəvi olaraq Heydər Əliyev Fondunun təşəbbüsü ilə Azərbaycanda keçirilən Bakı Marafonunda iştirak etmək istədiklərini bildiriblər.
Heydər Əliyev Fondunun və Azərbaycan Respublikasının Gürcüstandakı Səfirliyinin dəstəyi ilə ümumilikdə 20 nəfər olmaqla - 1 Azərbaycan, 1 Ukrayna, 1 Kanada, 2 Rusiya və 15 nəfər Gürcüstan vətəndaşı 2022-ci ilin 13 may tarixində səfirliyin qarşısından Bakı şəhərinə yola salınıblar.
Qeyd etmək lazımdır ki, 2016-cı ildən təşkil olunan Bakı Marafonu idmanın inkişafına dəstək göstərmək, sağlam həyat tərzini təbliğ etmək məqsədi daşıyır. “Küləyə qalib gəl” şüarı altında beşinci dəfə keçirilən Bakı Marafonu bu il fərqli marşrutda təşkil ediləcək. Yarışın start nöqtəsi ilə yanaşı finişi də Dövlət Bayrağı Meydanında olacaq və 21 kilometrlik məsafəni əhatə edən marafon bu marşrut üzrə baş tutacaq.

GAXA.ge