Bu gün qocaman və ustad jurnalist Dünyamalı Kərəmin 102 yaşı tamam olub, onun Ad Günüdür!

Bu gün 102 yaşı tamm olan qocaman jurnalistə cansağlığı, uzun ömür və daha çox yaşamasını arzulayırıq! Dünyamalı Kərəm Gürcüstanın hər cür mükafatlarına sahib olub. İstər “Şərəf” ordeni, istərsə də Əməkdar jurnalist fəxri adına layiq görülüb. Biz onun yubileylərini Borçalıda təntənəli şəkildə qeyd etməyi planlaşdırırdıq. Onun 65 yaşını qeyd edəndə ziyalılarımız toplaşdıq və onun yubileyini qeyd etdik.Təəssüf ki, pandemiya araya düşdü deyə onun 100 illik yubileyini qeyd edə bilmədik. Buna baxmayaraq biz Azərbaycanın Gürcüstandakı səfiri Faiq Quliyevə təşəkkür edirik ki, o, qocaman jurnalist Dünyamalı Kərəmi evində 100 ildən çox olan tarixi yaşı münasibətilə təbrik etdi. Bizim hamımız belə olmalıyıq. Bu gün qocaman jurnalistimizin 102 yaşı bizim üçün tarixin hədiyyəsidir ki, Dünyamalı Kərəm hələ bilmədiyimiz faktlarla dolu ömür yolundan söhbət açır, hətta yenə də şeirlər yazır. Hələ də həyətyanı torpaq sahəsində təsərrüfatda çalışan qocaman jurnalist uzaqdan görünən Qoçulu qalasına baxaraq ilham alır və qələmi yerə qoymur, bizə tarixi həqiqətlərdən məlumat verir!

Qocaman jurnalist vaxtilə “Kommunist”, “Sovet Gürcüstanı” qəzetlərində çalışıb. O, hətta “Kommunist” qəzetinin Qarabağ üzrə xüsusi müxbir vəzifəsində fəaliyyət göstərib, dövrün, zamanın keşməkeşli günlərindən cəsarətli yazılar qələmə alıb.

Allah cansağlığı versin! Dünyamalı müəllim hələ də gümrahdır. Hərdən zəngləşirik. Dostlardan, ötən illərdə çalışdığı jurnalist sənətkarlığından söhbət açır, arabir bəzi gileylərini də bildirir. Bu gün onun 102 yaşı münasibətilə Azərbaycan Mətbuat Şurasının sədri Əflatun Amaşov, vaxtilə “Sovet Gürcüstanı” qəzetində bir yerdə işləmiş, hazırda Bakı Dövlət Universitetinin professoru, qocaman jurnalist-alim Həmid Vəliyev, gənc alim-jurnalist Müşfiq Borçalı, şair-publisist Güllü Eldar Tomarlı, şair-həkim Azadə Taleh Abbasqızı, ziyalılarımızdan İsmayıl Həkimli, Sabir Mahmudov və digər qələm sahibləri onu təbrik edir və salamlarını göndərir, cansağlığı arzulayırlar.

Gəlin, biz oxucular, Dünyamalı Kərəmi tanıyanlar 102 yaşlı qocaman jurnalisti təbrik edək, ona uzaqlarda olsaq da quruca salam göndərərək onun qoca qəlbini isindirək, hələ yaşa-yarat deyək!

Nizami Məmmədzadə, Gürcüstan Azərbaycanlı Jurnalistlər Birliyinin sədri, Azərbaycanın Əməkdar jurnalisti