Ələkçiyə qıl verənlər...

(Felyetonvari yazı)

Vallah-billah mən bu cəmiyyətin üzvləri sayılan məmurların gülməli hərəkətlərinə məəttəl qalmışam. Görüşlərə bir qrupla gedən məmurlar əhaliyə vəd verməkdən yorulmurlar. Hazırda kəndlərdə içməli və suvarma su qıtlığının həll edilməməsi əhalini tamamilə bezdirib. Son vaxtlar Marneulidə ölüm hallarının artması da hər kəsə təəccüblü gəlir. İnsanlar öz-özünə müxtəlif suallar verirlər; kimi kim öldürüb? Nədən ölüb? Koronavirus infeksiyasına yoluxanların və dünyalarını dəyişənlərin adı hallanır. Kim təhqir olunub? Bazarda, çayxanalarda maska taxmırlar! Küçədə addımlayan gəncləri polis tutub cərimələyir! Səhiyyə nazirliyinin tövsiyələrinə baxan yoxdur. Bəzi hallarda digər vacib məsələlərə baxmayan polis əməkdaşları rüşvət alır və cinayət törədənləri ört-basdır edirlər.

Bütün bu hərəkətlər, çatışmazlıqlar və problemlər seçkilərə ürəklə getmək istəyən sakinləri soyudur. Əhali partiyalar arasında gedən dedi-qodudan bezib. Hər kəs bir nağıl quraşdırıb seçicilərə gəlhagəl mahnısı oxuyur. Demək olar ki, hər sözün altında bir qaranlıq məqam gizlənir. Seçkidə qələbə qazanmaq üçün artıq kəndlərdə müəyyən qrup üzvləri insanlara pul verilir və seçiciləri ələ alırlar. Bu ələkçinin qıl verənləri olan qruplar seçkidən sonra əhalinin arasında hörmətdən düşürlər. Onlar hətta namizədlərin nəzərində ikiüzlü şəxslərə çevrilirlər. Sonradan ələkçiyə qıl verənlər seçilən namizədə yaxınlaşıb pul müqabilində kiminsə problemini həll etməyi xahiş edəndə məmur vəzifəsinə seçilmiş namizəd onun sinəsindən elə itələyir ki, ələkçinin qıl verəni elə dombalaq aşır ki, düşdüyü dərənin dibindən onu tapa bilmirlər. Xalq artıq həqiqəti görmür.  Həqiqəti deyənlər ələkçiyə qıl verənlərin ”fəaliyyəti” sayəsində gözdən düşürlər. Deputat olmaq istəyən savadsız partiya üzvlərinin sayı çoxalır və  bir müddətdən sonra yalançı vədlərə inanan namizədlər təzyiqlər və pul xatirinə üzv olduqları partiyalardan uzaqlaşırlar.

Ələkçiyə qıl verənlər yenə də insanlar arasında gecə-gündüz dolaşırlar. Əllərini bir-birinə sürtərək pul qazanıb hırıldaşırlar. Bu hırıltının səsi cəmiyyəti şoka salır. Bu əməllərlə ələkçiyə qıl verənlər seçkilərdə namizəd olanları da gələcəyə hansı gözlə baxacaqlarını öyrədirlər.

Vay bizim halımıza! Görəsən, hansı cəmiyyətdə yaşayırıq? Onlara verilən pul müqabilində bəziləri ailəsini, dost-yoldaşını satır, illərlə çörək kəsdiklərinin arxasına bıçaq vurur, onların səsini yazdırıb rəhbərlərinə çatdırır və “molodes” qazanırlar! Biz də deyirik: “Molodes”, ay ələkçiyə qıl verənlər! Bir gün olacaq ki, özünüz qır qazanına düşəndə cızdağınız çıxacaq. Bax, onda kor qız kartofu görməyib, soğanın iyisini hiss edən kimi sizlər də təhlükə olacağını hiss etməyəcəksiniz! Bu sözləri ələkçinin qıl verənlərinə ünvanlayıram! İndi bu ələkçilər gəncləri də qızışdırıb jurnalistlərin də üstünə qısqırırlar. İllərlə yazarların dostluğuna da soyuq yanaşanlar fəaliyyətə başlayıb qələm sahiblərini də pul müqabilində “satırlar”. Belə olan halda jurnalistlər arasında kin-kudurət də artır. Onlar da qıl verənlərin sözlərinə baş əyib qələm sahiblərinin saf sözlərinə qulp qoyur, gizlincə bir-birinin ayağını qazır, bir az keçəndən sonra yazarlar arasında “tərifnamələr” başlayır, hətta belə mövzulara rəhbərlərə xoş gəlsin deyə münasibət də bildirmirlər!

Artıq bazarda alıcıların sayı da azalıb. Qıl verənlərin sayı isə çoxalıb. Seçkilər başa çatanda isə ələkçiyə qıl verənlər yenidən “dostuq” əlaqələrini nizamlamağa çalışacaqlar. Onda isə çox gec olacaq və qələm artıq tərif əvəzinə felyeton yazacaq! Məhz buna görə də öz vicdanınızın təmiz olduğuna inanmalısınız!

Nizami Məmmədzadə, əməkdar jurnalist