Gürcüstanın KİV nümayndələri Azərbaycanın mədəniyyət paytaxtı Şuşaya səfər ediblər
Azərbaycan Respublikasının Gürcüstandakı Səfirliyinin
təşkilatçılığı və SOCAR-ın Gürcüstan Nümayəndəliyinin dəstəyi ilə bir qrup
gürcü jurnalistlər, ekspertlər və tanınmış ictimai fəallar Azərbaycan
Respublikasında səfərdədirlər. GAXA-nın məlumatına görə, bu barədə səfirlik məlumat
yayıb və Şuşada çəkilmiş fotoşəkillər paylaşıb.
20 sentyabr tarixində Bakıda keçirilən görüşlərin
ardınca işğaldan azad olunmuş ərazilərə istiqamət götürən qonaqlar 21 sentyabr
tarixində Füzuli və Cəbrayıl rayonlarına baş çəkərək, orada ərazilərin
minalardan təmizlənməsi üzrə aparılan işlərlə, habelə bədnam erməni işğalçıları
tərəfindən yerlə yeksan edilmiş yaşayış məntəqələri və qəbiristanlıqlara baş çəkməyə,
habelə bəşəriyyət əhəmiyyətli Xudafərin körpüləri ilə tanış olmağa müvəffəq
olublar.
21 sentyabr axşam Şuşaya gəlmiş gürcü nümayəndə heyəti
22 sentyabr tarixində hal-hazırda fəal bərpa işlərinə start verilmiş Azərbaycanın
mədəniyyət paytaxtı Şuşa şəhərindəki vəziyyətlə ətraflı şəkildə tanış ola biliblər.
Belə ki, qonaqlar işğal dövründə dağıntılara, məhv və təhrif edilməsinə məruz
qalmış Azərbaycan mədəniyyətinin önəmli beşiklərindən birinin küçələri ilə gəzib
şəhərin hazırkı durumunu müşahidə edə biliblər. Dağıdılmış tarixi binalar və
abidələri öz gözü ilə görən gürcüstanlı qonaqlar işğalın dəhşətli üzünü daha
aydın şəkildə duyduqlarını bildiriblər.
İşğaldan sonra vandalizmə məruz qalmış və uzun illər
ərzində Bakıda “məcburi köçkün abidələri” kimi saxlanılmış Xanqızı Xurşidbanu
Natəvan, dahi Üzeyir Hacibəyli və Bülbülün büstlərini Şuşadakı doğma yerlərində
bərpa olunmuş halda görən qonaqlar bu əyani faktın onlara böyük təsir göstərdiyini
söyləyiblər. Eləcə də tarixi görkəmi qaytarılan Şuşa qalasının divarları, o
cümlədən Gəncə darvazası önündəki məşhur mənzərəyə, Azərbaycan dövləti tərəfindən
artıq bərpa edilmiş Bülbülün ev-muzeyinə və Vaqifin mavzoleyinə baxış keçirən
gürcü qonaqları, həmçinin Yuxarı Gövhərağa məscidini ziyarət ebiblər. Eyni
zamanda, onlar Cıdır Düzünə də baş çəkərək Səməd Vurğunun “Azərbaycan” şerindəki
“Könlüm keçir Qarabağdan,
Gah bu dağdan, gah o dağdan.
Axşamüstü qoy uzaqdan
Havalansın Xanın səsi,
Qarabağın şikəstəsi” – misralarının yaradılmasına
ruhlandıran füsunkar təbii mənzərədən heyrana gəldiyini söyləyiblər.
Gürcü ictimaiyyəti nümayəndə heyətinin Azərbaycana
səfəri davam edir.
Söhbət zamanı gürcü jurnalistlər, həmçinin bölgədəki
digər aktual məsələlərə toxunaraq, fikir mübadiləsini aparıblar. Ümumiyyətlə, səmimi
ab-havasında keçirilən bu dialoq Azərbaycan və Gürcüstan cəmiyyətləri
arasındakı qarşılıqlı hörmət və rəğbətin növbəti əyani təzahürü olub.
GAXA.ge