Marneulidə yerli biznes üçün imkanlar adlı seminar keçirilib
AB-Gürcüstan Biznes Şurası (EUGBC) 8-9 sentyabr
tarixlərində Marneulidə AB-Gürcüstan Dərin və Hərtərəfli Sərbəst Ticarət Sazişi
(DCFTA) çərçivəsində Gürcüstan üçün biznes İmkanları mövzusunda seminar keçirib.
GAXA-nın məlumatına görə, tədbir Qafqaz otelində baş tutub.
Seminarda EUGBC-in direktoru Qiorqi Kaçarava, İqtisadi İslah
Mərkəzinin rəsmisi Qiorqi Çitadze və digər nümayəndələr yerli kiçik və orta
sahibkarların AB-Gürcüstan Sərbəst Ticarət Sazişi (DCFTA) çərçivəsində davam edən
islahatlar haqqında ətraflı məlumat verərək, məhsulların uğurlu ixracı və
biznesin inkişafı üçün bütün imkanlardan istifadə yolları barədə fikirlərini
bildiriblər.
Seminar sual-cavab şəkilində davam edib.
Tədbirdə vətəndaş cəmiyyəti təşkilatlarının, biznes
birliklərinin və QHT rəhbərləri, jurnalistlər iştirak ediblər.
Məlumata görə, Marneulidən başqa, Gürcüstanın 7 bələdiyyəsində eyni məzmunlu seminarlar keçiriləcək və burada vətəndaş cəmiyyəti təşkilatlarının, biznes birliklərinin və yerli hakimiyyət orqanlarının nümayəndələri iştirak edəcək. Seminarlar Avropa Fondunun dəstəyi ilə AB-Gürcüstan Biznes Şurası (EUGBC) tərəfindən aparılacaq.
Seminarda qeyd edilib ki, Avropa Fondu ilə EUGBC
arasındakı əməkdaşlıq Gürcüstanın Avropa İttifaqı ilə Dərin və Hərtərəfli Sərbəst
Ticarət Sazişi (DCFTA) haqqında Gürcüstan bölgələrindəki ictimai təşkilatların
məlumatlılığını artırmaq məqsədi daşıyır.
GAXA.ge