Azərbaycan səfiri Tiflis Dövlət Uniiversitetinin rektoru ilə görüşüb
Azərbaycanın Gürcüstandakı səfiri Faiq Quliyev İvane
Cavaxişvili adına Tiflis Dövlət Universitetinin (TDU) rektoru Giorgi Şarvaşidze
ilə görüşüb. GAXA-nın məlumatına görə, Gürcüstanın tarixi əhəmiyyətə malik təhsil
ocağında Azərbaycan səfirini görməkdən məmnunluq duyduğunu bildirən rektor
strateji tərəfdaş olan Azərbaycanla Gürcüstan arasındakı əməkdaşlıq əlaqələrinin
bütün sahələrdə olduğu kimi təhsil sahəsində də yüksələn templə davam etdiyini
bildirib.
Rektor, həmçinin Bakı Dövlət Universiteti ilə TDU arasında
əməkdaşlıq əlaqələrinin inkişafı istiqamətində işlərin davam etdirilməsinin barədə
əhəmiyyəti barədə söz açıb.
Giorgi Şarvaşidze Tiflis Dövlət Universitetinin Azərbaycan
universitetləri ilə əməkdaşlığa hazır olduğunu qeyd edib.
Görüşdə TDU nəzdində Azərbaycan dili və ədəbiyyatı
fakültəsinin yaradılması, həmçinin qeyd olunan fakültənin yaradılmasının
Gürcüstanın Azərbaycan dilli məktəblərində kadr çatışmazlığı probleminin
qarşısını alacağına dair fikir mübadiləsi aparılıb.
Səfir F. Quliyev G.Şarvaşidzenin Azərbaycanla əlaqələrə
verdiyi böyük önəm və dəstəyə görə təşəkkür edib, TDU ilə Azərbaycan səfirliyi
arasında əlaqələrin bundan sonra da inkişaf edəcəyini bildirib.
Daha sonra Azərbaycan səfiri Tiflis Dövlət
Universitetindəki Heydər Əliyev Mərkəzində aparılan yenidənqurma və bərpa işləri
ilə tanış olub. Universitet rəhbərliyi mərkəzin təmir işlərinin növbəti tədris
ilinin başlanmasına qədər yekunlaşacağını bildirib.
GAXA.ge