Parlamentin sabiq deputatı Zümrüd Qurbanov dünən 57 yaşında qəflətən vəfat edib
Zümrüd Qurbanov 1963-cü ildə Marneuli rayonunun
Qızılhacılı kəndində anadan olub. Orta məktəbi bitirdikdən sonra Azərbaycan
Dövlət Pedaqoji institutun filologiya fakültəsini bitirib.
Zümrüd Qurbanlı bir müddət doğma elində müxtəlif vəzifələrdə çalışıb,
ictimaiyyət arasında xüsusi hörmətə layiq olub. 2000-2004-cü illərdə Gürcüstan
parlamentinin üzvü olub. Nəsr əsərləri və elmi-ədəbi yazıları ilə dövrü mətbuatda
müntəzəm olaraq dərc olunub. O, hekayə və povestlərini əsasən, “Zümrüd Orxan”
imzası ilə çap etdirib. Zümrüd Orxan bölgədə fəaliyyət göstərən ilk və ən güclü
xalq hərəkatı təşkilatlarından biri olan “Qeyrət”in yaradıcılarından biridir.
O, həm də “Qeyrət” qəzetinin baş redaktoru olub. Z. Orxan bir neçə toplunun
tərtibçisi və redaktoru kimi fəaliyyət göstərib.
Zümrüd Qurbanov qeyrətli insan idi. O, düzü-düz,
ərini-əyri deməyi çox sevirdi. Həmişə haqsızlığa qarşı mübarizə aparırdı. Onun
bəzən çılğın təbiətini dost-tanış çox sevərdi. Təbiətən zarafatcıl insan idi.
Nəşr etdirdiyi “Qeyrət” qəzetində və sosial şəbəkələrdə cəmiyyətin mənfi
elementlərini tənqid edən felyetonları ilə kəskin çıxışlar edərdi. Haqqı,
ədaləti tələb edən istedadlı, iti qələm sahibi idi. Çox sevdiyi Borçalının
problemləri onu daim narahat edərdi. Bəzən onu dəstəkləməyən qələm sahiblərinə
də öz narazılığını bildirirdi. Sözü üzə deyən insan olub. Vətənini, Borçalını,
Azərbycanı ürəkdən sevən insan idi. Azərbaycan həqiqətlərini müdafiə edən insan
idi. Dünyanın bu qeylü-qal vaxtında yaşadığı bölgənin problemlərini qaldırmağı,
cəsarətlə onların həllinə çalışmağı və həllini tələb etməyi bacarırdı.
Ailəsini, iki əkiz qızını çox sevirdi. Daim onların
qayğısına qalırdı. Dostlarının əhatəsində yumorla danışmağı çox sevirdi. Povest
və hekayələrinin qəhrəmanları real həyatdan idi. İndi də dostları onun nəsr
qəhrəmanlarının danışıqlarını, onların həyat tərzini, cəmiyyət içində olan
məcazi mənada rollarını çox sevirlər.
İnana bilmirik onun ölümünə, 57 yaş nədirki? Bu vəfasız
dünyadan qələminin zəngin məna dolu “möcüzə”sindən ayrı düşən Zümrüd Qurbanov
illər gecəcək, o, yenə də qəlbimizdə sağ kimi yaşayacaq, onu qeyrətli dost kimi
xatırlayacağıq.
Onun çılğın ürəyi özünə vəfalı olmasa da vəfalı
dostları, qohum-əqrəba, yaxın-uzaq insanlar hər zaman onun xatirəsini əziz
tutacaqlar.
Allah rəhmət eləsin. Ruhu şad olsun. Məkanı cənnət
olsun.
GAXA.ge