14:38

Gürcüstan Xarici İşlər Nazirliyi Gürcüstan ərazisindən Azərbaycan və Ermənistan istiqamətində hərbi nəqliyyatın mülki uçuşlarla həyata keçirildiyi barədə yayılmış məlumatları qəti şəkildə rədd edir. Nazirlik bunu "informasiya manipulyasiyası" kimi qiymətləndirir. GAXA-nın məlumatına görə, bu barədə Gürcüstan xarici işlər nazirinin müavini Laşa Darsalia bildirib. Onun sözlərinə görə, konkret daşıyıcılar və yük sahibləri beynəlxalq hüquqa tam riayət olunmasından və humanitar dəhlizlərdən istifadə edilməməsindən məsuldurlar.

Eyni zamanda Darsalia Gürcüstan ərazisindən hərbi tranzit olmadığını söyləyib.

“Məlumdur ki, Qarabağdakı gərginləşmə başlayandan dərhal sonra Gürcüstan hərbi yüklərin həm Azərbaycan, həm də Ermənistan istiqamətində quru və hava yolu ilə tranzitini dayandırdı. Buna görə də Gürcüstan ərazisindən hərbi tranzitin həyata keçirilmədiyini təkrarlamaq istəyirik. Gürcüstanın sərəncamında olan sənədlərə görə, Gürcüstanın hava məkanında həyata keçirilən uçuşlar yalnız humanitar və mülki xarakter daşıyır və Beynəlxalq Mülki Aviasiya Təşkilatının (ICAO) standartlarına tam uyğundur. Gürcüstan humanitar, mülki, o cümlədən ticarət yüklərinin keçməsi ilə bağlı öhdəliklərini yerinə yetirməyə davam edir.

Xüsusi daşıyıcılar və yük sahibləri beynəlxalq hüquqa tam riayət olunmasından və humanitar dəhlizlərdən istifadə edilməməsindən məsuldurlar. Qanun pozuntuları aşkar edilərsə və əsaslı əsaslar varsa, Gürcüstan buna müvafiq reaksiya göstərəcək və pozucular ICAO da daxil olmaqla beynəlxalq hüquqa uyğun olaraq cavab verməli olacaqlar”,- deyə Laşa Darsalia bildirib.

GAXA.ge