Gürcüstanda Azərbaycan Silahlı Qüvvələr Günü qeyd olunub
Bu gün Tiflisdəki
Meydan məhəlləsində ucaldılan ulu öndər Heydər Əliyevin büstü önündə Azərbaycan
Silahlı Qüvvələr Günü qeyd olunub. GAXA-nın məlumatına görə, tədbir çərçivəsində
Azərbaycan səfirliyinin rəsmi şəxsləri, o cümlədən səfir Dursun Həsənov, hərbi
attaşe polkovnik-leytenant Fuad İbrahimov, hərbi attaşe aparatı əməkdaşları
Heydər Əliyevin büstü önünə gül-çiçək dəstələri qoyaraq, ulu öndərin xatirəsini
ehtiramla yad ediblər.
Məlumata görə, 26 iyun- Azərbaycan Silahlı
Qüvvələr Günü münasibətilə təşkil olunan tədbirə əslən Gürcüstanın Bolnisi və
Marneuli rayonlarından olan şəhid ailələrinin üzvləri və qohum-əqrəbaları
qatılıblar.
Tədbirdə iştirak
edən D. Həsənov və hərbi attaşe polkovnik-leytenant
Fuad İbrahimov bu gün qeyd olunan Azərbaycan Silahlı Qüvvələr Gününün 102-ci
ildönümü ilə əlaqədar şəhid ailələrini təbrik edib və Vətən torpaqları uğrunda
həlak olan şəhidlərə rəhmət diləyiblər.
Hərbi attaşe
polkovnik-leytenant Fuad İbrahimov GAXA-ya açıqlamasında şəhid ailələrinin üzvləri
ilə yaxından söhbət etdiyini və onların problemləri ilə maraqlandığını
bildirib. Onun sözlərinə görə, “bu gün keçirilən Azərbaycan Silahlı Qüvvələr
Gününün 102-ci ildönümü daha təntənəli keçirimək istəyirdik, lakin dünyada
tüğyan edən koronavirus infeksiyasından ehtiyat etdik. Biz tədbirdə yalnız şəhidlərin
xatirəsini yad etdik və onların ailələrinə səbr dilədik və onları narahat edən
problemlərin həlli üçün şəhid ailələrinin hər biri ilə ayrı-ayrılıqda görüşüb
söhbət etdik”.
Hərbi attaşe polkovnik-leytenant Fuad
İbrahimov qeyd edib ki, dünyada, eləcə də həm Azərbaycanda, həm də Gürcüstanda gözəgörünməz
koronavirus infeksiyası yox olandan sonra Azərbaycan Silahlı Qüvvələr Günü təntənəli
şəkildə qeyd olunacaq.
GAXA.ge