Müdafiə naziri İrakli Qaribaşvili Marneuliyə səfər edib
Gürcüstanın Müdafiə naziri İrakli Qaribaşvili Marneulidə
Müdafiə Qüvvələrinin qurduğu buraxılış məntəqələrində olub. GAXA-nın məlumatına
görə, bu barədə Gürcüstan Müdafiə Nazirliyi məlumat bildirib. İrakli
Qaribaşvili Müdafiə Qüvvələri nümayəndələrinin koronavirusun yayılmasının
qarşısını almaq üçün gördüyü işlər barədə ətraflı məlumatı dinləyib. Nazir yerdəki
vəziyyətlə tanış olduqdan sonra Marneulidəki Aviasiya Bazasına yola düşüb.
Qeyd edək ki, karantin zonasında beş yoxlama məntəqəsi
qurulub. Müdafiə qüvvələri, həmçinin patrul pilotsuz uçuş aparatları daxil
olmaqla, 7 müşahidə yolu vasitəsilə bölgəyə nəzarət edir. Şərq Komandanlığı
bölmələri Tetritskaro-Marneuli və Qırmızı Körpü-Rustavi yolları boyunca xüsusi
təyin olunmuş keçid məntəqələrinə nəzarət edir və nəqliyyat vasitələri
dezinfeksiya edilir.
Sahə çadırlarında Müdafiə Qoşunlarının tibb heyəti vətəndaşlar üçün tibbi müayinələr aparırlar.
Xatırladaq ki, Gürcüstan hökumətinin qərarı ilə koronavirusun yayılmasının yüksək riski ilə əlaqədar azərbaycanlıların kompakt yaşadıqları Marneuli və Bolnisi rayonlarında karantin elan olunub.
GAXA.ge